Maamul goboleedka Soomaaliyeed ee Puntland ayaa maanta qaadacay oo diiday lacagta cusub oo ay qorshaysanayso in dowladda KMG ah ee Somalia ay soo daabacdo si looga isticmaalo dalka.Wasiirka Maaliyadda maamulka Puntland Faarax Cali Shire oo shir jaraa'id ku qabtay magaalad Garowe ee ayaa sheegay in maamulka Puntland uu kahorjeedo lacagta cusub oo ay soo wado dowladda KMG ah ee Somalia.
Wasiirka maaliyadda Puntland ayaa sheegay in maamulkoodu aanu marna raali ka aheyn in lacagta cusub laga isticmaalo deegaanada maamulka Puntland, waxaana uu ganacsatada iyo shacabka Puntland uga digay inay isticmaalaan lacagta cusub.
Wuxuu sheegay in lacagta cusub ay tahay mid lagu doonayo in lagu dhaco hantida ganacsatada Soomaaliyeed islamarkaana dalka Somalia looga abuuro sicir barar sida uu hadalka u dhigay wasiirka maaliyadda maamulka Puntland.
"Marna lacagtaasi looma soo gudbin doono Puntland oo ma doonayno in laga isticmaalo" ayuu yiri Mudane Faarax Cali Shire wasiirka Maaliyadda maamulka Puntland oo wariyaasha kula hadlayey magaalada Garowe xarunta maamulka Puntland.